30/01/2013 09:03:32

Ferri BLU. Policia shqiptare 'Top' në duart e politikanëve

Intervistë me Kreun e Sindikatës së shërbimeve policore Valentin Macaj: diskriminimi, pagat e ulëta, mungesa e trajnimeve dhe e transporteve. Ferri që kalojnë çdo ditë uniformat blu, ata që duhet t'i japin siguri qytetarëve

TIRANE - A mund të na jepni ndonje të dhënë mbi nivelin e krimit në Shqipëri gjatë 2-3 viteve të fundit ?

Rritja e veprave kriminale dhe zbulueshmëria e tyre në Shqipëri janë në kontrast me njera-tjetrën sa herë debatohet nga aktorët politikë dhe për këtë arsye përcillen shifra të ndryshme nga burime të shumta jo profesionale. Sindikata është e prirur në kërkesën për ndryshimin e kushteve të punës e trajtimit financiar të punonjësit teëpolicisë dhe për arsye etike nuk merret shumë me detaje teknike që i përkasin Prokurorisë së shërbimeve të specializuara që operojnë në vend. Që ka një punë vetëmohuese të shërbimeve policore në drejtim të vendosjes së rendit dhe besimit në publik, kjo është evidente. Politika është ajo që po luan dhe debaton me një profesion që nuk i përket asaj. Qeveritë e rajonit dhe europiane janë të angazhuara në përmirësimin e pagave e trajtimit në policitë e tyre, ndërsa këtu tentohet që policia të ngopet me politikë fjalë boshe. Por, në vijim të pyetjes, përgjigja jonë është se: krimi po gjen terrenin e duhur dhe po gllabëron çdo qelizë të shoqërisë duke patur aleat të fortë mafian në klanet politike e gjyqësore.


A është e vertetë se policia ka trajtimin me të ulët financiar në Europë dhe rajon ?

Megjithë ndryshimet e ligjeve respektive për Policinë e Shtetit, (ligji nr.9749 viti 2007), Për Policinë e Burgjeve, (ligji nr.10032 viti 2008), dhe përafrimit të tyre me para-standartet e BE-së, situatë në këto shërbime është e ndryshme dhe diskriminuese. Pagat në mes shërbimeve policore janë të dallueshme dhe me diferencë të madhe në mes gradave. Punonjësi i nivelit zbatues në Policinë e shtetit merr një pagë mujore bruto prej 319 Euro ndërsa paga mujore e Drejtorit të Përgjithshëm të Policisë arrin në 790 Euro. Diferencat në pagë sipas gradës dhe funksionit nuk kanë koment, pasi duken qartazi pabarazia dhe trajtimi ofendues i punonjësit të policisë shtetit. Këto paga i nënshtrohen ndalesave të shumta në sigurime shoqërore, shëndetësore, suplementare. Po këto paga krahasuar me kolegët e tyre në rajonin ballkanik, përjashtuar Greqinë (anëtare e BE) janë:

Policia e Shtetit

Gradat Shqiperi Bosnje-Herceg. Kosove Mali Zi Maqedoni
Inspector €319 €390 €480 €700 €345
n/komisar 420 660 640 1010 560
Drejtuesi I 790 820 1052 1040 1010

Pagat në Shërbimin Zjarrfikës vijojnë pothuajse të njëjta me Policinë e Shtetit, ndërsa krahasuar me pagat e kolegëve të tyre ballkanas, vijojnë të jenë me 15-50% më të ulëta.

Në Shqipëri ndodh edhe diskriminim real në mes shërbimeve policore, ku punonjësi i Punonjësi i Policisë së Burgjeve deri dhe Drejtori i Përgjithshëm i kësaj Policie kanë diferencë mes kolegëve me të njëjtën gradë e funksion në Policine e Shtetit.

Policia e Burgjeve:

Grada Paga baze per grade
N/inspektor €244.60
N/komisar 377.6
Drejtues i I-re 683.4

Tabela e mësipërme (sipas vkm1060 dt.8/7/2010) është treguesi i diferencës në pagë në mes shërbimeve policore. Shto edhe policinë bashkiake e cila paguhet sipas ligjit nr. 8224,dt.15/05/1997 i cili nuk ka asgjë të përbashkët me detyrën, funksionin dhe kushtet e reja të integrimit europian.

Me cilat vështirësi përballen uniformat blu ?

Mungesa e besimit në publik, ngaqë reformat e njëpasnjëshme dhe rekrutimi i punonjësve pa kualifikim të mjaftueshëm sjellin përformancë të dobet, duke shtuar edhe pagën e ulët mujore, japin një rritje të elementit korruptiv dhe mitmarrjes për shkak te detyres. Trajtimi politik I punës së policisë duke përfshirë suksesin e dështimin, ka shkaktuar një amulli dhe mungesë dëshire në kryerjen e shërbimit. Duke qene nën presion të vazhdueshem, I kërcënuar çdo moment me ulje në gradë, transferim dhe largim, punonjësi i policisë zgjedh mënjanimin nga përballja me krimin dhe shkelësin e ligjit, pasi nga eksperienca 20-vjeçare, politika ka sjellë elementin kriminal dhe ka larguar profesionistin. Shembujt janë të shumtë, pasi publiku e media flet e shkruan çdo ditë.

Mungesa e trajtimit ushqimor me një vakt çdo ditë shërbimi, sjell pakësim të ardhurash dhe nxitje për korrupsion për çdo punonjës policie. Në këtë mënyrë ndikon dhe mospagesa e transportit, gjë e cila demaskon e ofendon figurën e punonjësit të policisë.

Jemi dëshmitarë sesi punonjësit e policisë së burgjeve, shtetit, shërbimit zjarrfikës, policisë bashkiake bëjnë çdo ditë autostop nëpër kryeqëzimet e rrugës nacionale për t'u kthyer në banesë pas shërbimit si dhe anasjelltas.

Mospagesa e gadishmërisë në ditët e festave dhe vjetërsisë në punë, sjell një minus të madh ne pagën mujore, pa përmendur ndalesat e shumta e pa kriter në list-pagesat e policisë së burgjeve dhe ku drejtuesit e këtyre institucioneve bëjnë indiferentin në rastet kur sindikata kërkon llogari.

Kushtet e punës në ambjentet e shërbimit janë skandaloze si në kullat e rojës ashtu dhe në regjimet e brendshme, shto dhe mungesën e ngrohjes e xhamave. Imagjino një punonjes policie në burgun Drenovë, Kukës e Tropojë të cilët nën temperature -10 gradë kryejnë shërbim në kupola.

Pak më ndryshe është situata në Policinë e Shtetit, të cilët lëvizin me mjete shërbimi ose kanë ambjente të pranueshme shërbimi nëpër komisariate e drejtori qarqesh. Megjithëse në disa komisariate, kushtet e punës lënë shumë për të dëshiruar dhe do të jetë e largët dita kur do të përafrohen me kolegët ballkanas e europiane.

Policia e shtetit gëzon uniformë të rregullt sipas përcaktimeve në ligjin e saj, ndërsa Policia e Burgjeve endet qysh prej 5 vitesh pa uniforma e pa shpresë se do të zgjidhet ky problem. Pa asnjë dyshim, sindikata e ka etiketuar këtë shërbim si “polici gabi” ngaqë uniformat, këpucët, xhupat e këmishat i blejnë në tregjet e Tiranes.

Askush në Drejtorinë e burgjeve nuk mban përgjegjësi lidhur me skandalin e uniformave dhe pse sindikata e denoncon gjithnjë këtë fakt. Ndryshe nga policia e shtetit, ajo e burgjeve është nën presion të vazhdueshëm politik e administrative pasi drejtuesit e saj janë persona extra politike dhe aspak profesioniste.

Transferimet, uljet në gradë, largimet selektive nga puna, tashmë janë në mode në Policinë e Burgjeve duke mos harruar mungesën e trajnimeve profesionale në këtë shërbim.

Në të dy shërbimet policore mungon trajtimi shëndetësor e mental,(psikologjik), ku në shumë raste si pasojë e mbingarkesës në pune dhe kryerjes së shërbimit nën stress e presion për shkak të detyrës dhe kushteve të vështira financaire në familje, punonjësi i policisë arrin në depresion e vetëvrasje.

Shifrat e vetëvrasjeve në Policinë e Burgjeve në 5 vitet e fundit janë me dy shifra, pa përmendur pastaj vrasjet për shkak të detyrës dhe mungesës së përdorimit të mjeteve mbrojtëse e parandaluese në Policinë e Shtetit.

Problemet janë të shumta dhe rrugët e zgjidhjes së tyre janë të zymta në këtë realitet të mbingarkuar me politikë e korrupsion të gjithanshëm.

Gjatë viteve të fundit ka ardhur në përmiresim apo jo trajtimi i tyre ?

Gjatë këtyre viteve ka patur përmirësime mikroskopike të kushteve dhe trajtimit financiar në shërbimet policore kundrejt premtimeve politike që janë bërë në çdo rast zgjedhor apo kur është humbur jetë polici në krye të detyrës.
Në rastet e vrasjeve në krye të detyrës, e gjithë politika rreshtohet me lule para arkivoleve dhe mjaftohen me tituj nderi e përlotje të rastit, ndërsa pas pak orësh rikthehet e njëjta situatë pa marrë askush përgjegjësi mbi supe.

Teoria e pandëshkueshmërisë ka zënë vend në realitetin shqiptar dhe askush nuk guxon të ngrejë krye përballë korrupsionit e mafias që ka ngërthyer vendin. Korrupsioni i lartë ka sjellë stabilitet mafioz dhe është shumë e vështirë që punonjës me paga qesharake të kenë motiv për të zbatuar ligjin.
Reforma prek vetëm nivelet e ulëta, pasi ato të larta kanë një korace mbrojtese klanore e financiare.

Shumë prej nesh ngre gishtin mbi personat përgjegjes, por shteti nuk ndërhyn dhe nuk ka ndërmend të ndërhyjë për shkak të ekuacioneve politike.
Viktimë e këtij makinacioni ka rënë dhe shërbimi policor në përgjithesi dhe as përfaqësitë e huaja diplomatike nuk e ngrenë zërin siç duhet për këtë situatë alarmante.

Trajtimi financiar i policisë në pergjithesi eshte problematic dhe nen nivelin ballkanik ku gjithnje shantazhohet me pagat bruto pa deklaruar pagen reale qe gezon cdo punonjes policie respektiv. Sindikata jone ka kerkuar dhe kerkon pagen reale, ate qe I shkon ne xhep policit, dhe jo demagoxhi boshe me rritje-breshke qe ndodh sa here ka tyrbulenca politike.

Për mendimin tonë trajtimi financiar, shoqëror, shëndetësor e moral në shërbimet policore shqiptare është në regres të vazhdueshëm dhe vetëm një ndërhyrje reformuese apolitike do të ndryshojë situatën në favor të punonjësve.


* Tabelat e mësipërme të pagave bazohen në VKM respektive të policisë së shtetit dhe asaj të burgjeve, ndërsa krahasimi me pagat e rajonit është marrë nga një studim i kryer nga misioni PamecaII në Shqipëri.



* Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi

Doriana Metollari

Dërgo me email | Stampo artikullin